АҚШ Пхеньяннинг Россияга қурол беришидан хавотирда
Қўшма Штатлар Путин ва Ким Чен Иннинг учрашувини диққат билан кузатиб боради.
АҚШ КХДР етакчилари Ким Чен Ин ва Россия президент Владимир Путин ўртасидаги учрашув натижаларини диққат билан кузатиб боради ва агар Шимолий Корея Россияга ҳар қандай қурол-яроғ топширса, ҳар икки давлатга қарши янги санкциялар жорий қилади. Бу ҳақда АҚШ Давлат департаменти расмий вакили Метю Миллер маълум қилди.
“Иккала давлатга эслатиб ўтаманки, Шимолий Кореядан Россияга қурол-яроғнинг ҳар қандай узатилиши БМТ Хавфсизлик Кенгашининг бир қанча резолюцияларини бузиш ҳисобланади”, — деди Миллер.
Унинг қўшимча қилишича, Америка томони КХДР ва Россияга қарши санкциялар бўйича босимни давом эттириши ва янги чекловларни қўллашдан тортинмаслиги ҳақида огоҳлантирди.
Айни вақтда Корея марказий ахборот агентлигининг хабар беришича, 10 сентябрь куни Ким Чен Ин Пхеньяндан махсус поездга ўтириб, Россия Федерациясига йўл олган. Унга партия, ҳукумат ва мамлакат қуролли кучларининг асосий раҳбарлари ҳамроҳлик қилмоқда.
