АҚШ Шимолий Кореянинг йирик хакерлар гуруҳига санкция қўймоқчи
Бу тўғрисида резолюция БМТ хавфсизлик кенгашига киритилган.
АҚШ Шимолий Кореянинг Lazarus Group хакерлар гуруҳига санкция жорий этишни таклиф қилди. Бу ҳақда Вашингтон вакиллари БМТ Хавфсизлик кенгашига резолюция киритган.
Бу КХДРнинг янги ракета синовларига жавобан амалга оширилмоқда. АҚШ ишлаб чиққан ҳужжатда келтирилишича, Lazarus Group бир қатор Россия мудофаа ташкилотлари ва энергетика секторига киберҳужум уюштирган.
Бундан ташқари, гуруҳ киберайғоқчилик, маълумотлар, пул маблағларини ўғирлаш ва бошқа зарарли фаолият турлари билан шуғулланади.
“Ушбу гуруҳ 2007 йилда тузилган. У Бош разведка бошқармасининг 110 тадқиқот марказига бўйсунади ва 3 техник кузатув бюроси деб ҳам аталади ҳамда КХДРнинг кўплаб кибероперацияларига жавоб беради.
Гуруҳ қўлга киритган маълумотлар Пхеньянга санкцияларни четлаб ўтиш ва БМТ хавфсизлик кенгашининг тегишли резолюцияларини бузиш имконини беради”, – деб қайд этган ҳужжат муаллифлари.
Уларнинг қўшимча қилишича, 2020 йилда Lazarus Group Ҳиндистоннинг ўта муҳим ижтимоий инфратузилмаларига "DTrack" вирусли дастури орқали ҳужум уюштирган. 2020 йилда Германия ва Россия мудофаа ҳамда энергетик компаниялари ҳам уларнинг зарбасига учраган. 2021 йилга эса Япония ва ЖАР компаниялари уларнинг қурбонига айланган.
Аввалроқ Япония ва АҚШ КХДР ракета синовларига жавобан қўшма ҳарбий машғулот ўтказганди.
