15 сентябр куни АҚШ Қуролли кучлари гиёҳванд моддалар ташиётгани гумон қилинган Венесуэла кемасига зарба берди. Бу ҳақда Президент Доналд Трамп маълум қилди.
Трампнинг сўзларига кўра, зарба кема халқаро сувларда, АҚШ томон ҳаракатланаётган вақтда амалга оширилган. Ҳужум натижасида кемада бўлган уч нафар эркак ҳалок бўлган.
АҚШ президенти бу воқеани “шафқатсиз наркокартеллар ва наркотеррорчиларга қарши иккинчи зарба” деб баҳолади. Унга кўра, Қўшма Штатлар томонидан венесуэлалик наркокартелларга тегишли кемага қарши биринчи ҳужум сентябр ойи бошида Кариб денгизининг жанубий қисмида амалга оширилган.