АҚШда яна самолёт ҳалокатга учради
Самолёт бортида камида олти киши бўлган.
Кеча, 31 январ куни АҚШнинг Филаделфия шаҳрида ичида 6 нафар йўловчиси бўлган самолёт ҳалокатга учради. Федерал фуқаро авиацияси бошқармаси маълумотларига кўра, авиаҳалокат маҳаллий вақт билан тахминан 18:30 да содир бўлган. Самолёт Филаделфиянинг шимолий-шарқий аэропортидан ҳавога кўтарилиб, Миссури штатидаги Спрингфилд-Брансон аэропортига йўл олган. У кўтарилганидан 30 сония ўтиб, радар экранларидан ғойиб бўлган. Ўша пайтда ҳаво кемаси 1600 фут (487 метр) баландликда бўлган.
Ҳалокатга учраган самолёт бортида камида олти киши бўлган. Уларнинг тақдири ҳақида ҳозирча расмий маълумот берилмаган. Хабарларга кўра, самолёт қулаган ҳудуд яқин атрофидаги яна бир неча киши турли хил куйиш жароҳатлари билан шифохонага ётқизилган.
Темпл университети шифохонаси ҳалокатда жабрланган олти нафар беморни қабул қилганини маълум қилган. Шифохона маълумотларига кўра, ушбу беморларнинг уч нафари даволаниб, уйига кетишига рухсат берилган ва яна уч нафари қониқарли ҳолатда шифохонага ётқизилган.
