Арманистон КХШТ машғулотларида иштирок этмайди
Ҳарбий-ўқув машқлари Қозоғистонда бўлиб ўтади.
Арманистон Озарбайжон билан чегарадаги вазият туфайли Қозоғистондаги КХШТ машғулотларида иштирок этмайди. Бу ҳақда мамлакат мудофаа вазирлиги маълум қилди.
“Арман-Озарбайжон чегарасидаги вазиятни ҳисобга олиб... мудофаа вазирлиги Арманистон қуролли кучлари олдига қўйилган вазифалардан келиб чиқиб Қозоғистон Республикасида ўтказиладиган КХШТ доирасидаги машғулотларни иштирок этмасликка қарор қилди”, – дейилади вазирлик ахборотида.
КХШТ ҳарбий машқлари 26 сентябрдан 8 октябргача ўтказилиши режалаштирилган.
Озарбайжон-Арманистон чегарасидаги вазият сентябрь ўрталарида кескинлашди. 13 сентябрь куни икки давлат ҳарбийлари ўртасида тўқнашувлар авж олди. Расмий Боку Ереванни провокацияда айблаб, арман ҳарбийлари таъминот йўлларини миналаштирганини ва отишмалар уюштирганини маълум қилган.
Чегарадаги кескин вазиятни ҳисобга олиб Арманистон КХШТга ёрдам сўраб мурожаат қилди. Бундан ташқари, бош вазир Никол Пашинян Самарқанддаги ШҲТ давлат раҳбарлари саммитидаги иштирокини бекор қилди.
Аввалроқ Озарбайжон озод қилинган Қорабоғ ҳудудларини қайта тиклаш учун қанча маблағ ажратганини очиқлаганди.
