Австрия канцлери: “Эмланганлар учун пандемия якунланди”
Австрия канцлери: “Эмланганлар учун пандемия якунланди”.
Австрияда тўлиқ эмланган фуқаролар учун коронавирус пандемияси якунланди. Бу ҳақда мамлакат канцлери Себастьян Курц маълум қилган.
Канцлер шу билан бирга бу коронавируснинг буткул йўқолиб кетишини англатмаслигини айтган. Курц тўлиқ эмланган фуқароларга локдаун жорий қилинмаслигига ваъда берган. Шу билан бирга амалдор вакцина олишни истамаганларни кундалик ҳаётида чекловлар бўлишига тайёр туришга чақирган.
Себастьян Курц мажбурий эмланишга қарши чиққан кам сонли давлат раҳбарларидан бири. У коронавирус билан касалланиш ортиши фонида аҳолига мурожаат билан чиққан. Австрияда 2021 йил августидан буён Covid-19 ҳолатлари кўпайган.
Сўнгги вақтларда дунёда коронавирус билан касалланиш яна ортмоқда. Олимлар буни “дельта-штамм”нинг тарқалиши билан боғлаяпти. Кўп давлатларда чекловлар ва мажбурий эмлашга қарши намойишлар бўлиб ўтмоқда. Жумладан, Таиландда 7 сентябрь куни норозилик акциялари бўлган.
