БААдан Ўзбекистон тарихий шаҳарларига сайёҳлар оқими кўпайтирилади
Дубай шаҳридаги Ўзбекистон Бош консулхонасида Амирликларда фаолият юритувчи сайёҳлик ширкати мудири билан учрашув бўлди.
Дубай шаҳридаги Ўзбекистон Бош консулхонасида Амирликларда фаолият юритувчи сайёҳлик ширкати мудири Равшан Зокиров билан учрашув бўлиб ўтди, деб хабар бермоқда “Дунё”.
Учрашувдан кўзланган асосий мақсад Ўзбекистонда туризм соҳасида олиб борилаётган кенг кўламли ислоҳотларни тарғиб этиш, Тошкент, Самарқанд, Бухоро ва Хива каби кўҳна шаҳарларда саёҳатчилар учун яратилган шарт-шароитлар, республика бой маданий ва маънавий мероси тўғрисида маълумотлар бериш, ўзбек халқининг тарихи, маданияти, урф-одатлари ва анъаналарини кенг тарғиб этиш, оммалаштириш ва мамлакатга хорижлик сайёҳлар оқимини кўпайтириш билан изоҳланади.
Сайёҳлик ширкати мудири билан Ўзбекистонга сайёҳлар оқимини янада кўпайтириш ва уларнинг талабларидан келиб чиқиб, янги туризм хизматларини ўз ичига олган махсус турпакетлар ишлаб чиқиш бўйича фикр алмашилди.
Музокаралар якунида сайёҳлик ширкати билан Ўзбекистоннинг тарихий шаҳарларига сайёҳларни жалб этиш бўйича ҳамкорлик қилишга келишиб олинди.
