Байден пандемия бўйича янги глобал саммит чақирмоқчи
Бундан аввал шу каби саммит сентябрда ўтказилган эди.
Жозеф Байден коронавирус масаласи бўйича янги саммит чақирмоқчи. Бу ҳақда унинг миллий хавфсизлик бўйича маслаҳатчиси Жейк Салливан маълум қилди.
Саммитни 2022 йил бошида ўтказиш режалаштирилмоқда. Салливан АҚШ шу кунгача бутун дунёга 225 миллион доза вакцина тақдим этганини алоҳида таъкидлади.
“Коронавирус билан боғлиқ мақсадларни амалга ошириш учун давлат котиби Энтони Блинкен ноябрда махсус тадбир ўтказади. Байден эса кейинги йил бошида бутун дунёни тўпламоқчи”, – деган Оқ уй амалдори.
Бу АҚШ президентининг пандемия бўйича биринчи саммит ўтказиши эмас. Сентябрь ойида, БМТ Бош Ассамблеясининг 76 сессияси доирасида Байден коронавирус бўйича халқаро учрашув ташкил этганди.
Бундан аввал Байден АҚШ вакциналар эвазига дунё давлатларидан ҳеч нарса талаб қилмаслигини айтганди. Шунингдек, Хитой дипломати АҚШнинг коронавирус келиб чиқиши бўйича ҳисоботини "ғайриилмий" деб баҳолагани хабар берилганди.
Жаҳонгир Қўзиев
