Болтиқбўйи давлатлари ва Польша БМТни Беларус раҳбариятига қарши чора кўришга чақирди
Улар Минск муҳожирларни Европа Иттифоқи чегараларини ноқонуний кесиб ўтишга ундаётгани иддао қилинмоқда.
Эстония, Латвия, Литва ва Польша бош вазирларининг қўшма баёнотида айтилишича, ноқонуний муҳожирлар оқими Иттифоқга "гибрид ҳужум" бўлиб, у "Александр Лукашенко режими томонидан режалаштирилган ва тизимли равишда ташкил этилган".
Бирлашган Миллатлар Ташкилотининг эътиборини бу муаммога қаратадиган вақт келди, дейди тўрт давлат бош вазирлари.
"Биз Бирлашган Миллатлар Ташкилотининг Қочоқлар бўйича Олий Комиссарлиги идорасини ушбу вазиятни ҳал қилишга ёрдам бериш учун фаол чоралар кўришга, шунингдек, Беларусдан халқаро мажбуриятларини бажаришни талаб қилишга чақирамиз", — дея таъкидланган баёнотда.
Шунингдек, баёнотда чегарадан ўтаётган барча қочқинлар қабул қилиниши, лекин келажакда ноқонуний миграцияни олдини олиш учун Европа Иттифоқи янги чеклов чораларини жорий этиш имкониятларини кўриб чиқиши кераклиги таъкидланган.
Насиба Тўхтаева
