Будапешт Россия-Украина музокаралари ўтказилиши учун очиқ – Петер Сиярто
Венгрия бош дипломати, шунингдек, унинг мамлакати ҳеч қачон қурол транзити ҳудудига айланмаслигини маълум қилган.
Венгрия Будапештда Украина можаросини ҳал қилиш бўйича музокара ўтказишни таклиф қилди. Бу ҳақда мамлакат ташқи ишлар вазири Петер Сиярто El Pais нашрига берган интервьюсида айтиб ўтди.
“Аввал бизнинг РФ билан прагматик алоқаларимиз бор эди. Уруш бошланганидан буён бош вазир [Виктор Орбан] Владимир Путин билан бир неча бор телефон орқали мулоқот қилди. У Будапештни исталган турдаги тинчлик музокаралари учун таклиф қилди”, – деган дипломат.
Шунингдек, Венгрия ТИВ раҳбари Украина билан чегара қурол етказиб бериш нуқтасига айланишига қаршилигини маълум қилган ва Будапешт ҳеч қачон қурол транзити ҳудудига айланмаслигини қайд этган.
Аввалроқ Сиярто Россия нефтига қарши эмбаргога қўшилиш шартини очиқлаганди.
