Бугун НАТО саммитига старт берилади
Унда йирик ўзгаришлар бўлиши кутилмоқда.
Сешанба куни Мадридда НАТОнинг уч кунлик саммитига старт берилади. Унда йирик ўзгаришлар бўлиши кутилмоқда.
Саммитининг асосий масалалари қаторига альянснинг 2030 йилгача бўлган стратегик концепцияси қабул қилиш, Украина можароси, Россия билан мулоқотдан расман воз кечиш ва уни асосий таҳдид деб эълон қилиш, Европадаги кучлар сонини сезиларли даражада ошириш ҳамда Туркиянинг Швеция ҳамда Финляндиянинг НАТОга қўшилишига қўйган ветосини олиб ташлаш кабилар киради.
“ТАСС”нинг қайд этишича, жорий учрашув том маънода тарихий бўлади: Шимолий Атлантика блоки 30 йил ичида илк бор ўзининг асосий вазифасига — Россияни тийиб туришга қайтади. Унинг янги Стратегик концепциясида Москва альянс хавфсизлиги учун асосий таҳдид деб эълон қилинади. Бундан ташқари, НАТО тарихида илк бор унинг асосий ҳужжатида Хитой тилга олиниб, у “тизимли чақириқ” сифатида белгиланиши кутилмоқда.
Шунингдек, альянс кучлари қарийб етти баробарга оширилади — ҳозирги 40 мингдан 300 минггача. Украинага ҳам йирик ҳарбий ёрдам пакети тасдиқланади.
Аввалроқ НАТО Хитой ва Россия билан муносабатларини қайта кўриб чиқиши тўғрисида хабар берилганди.
