Буюк Британия НАТОни глобал ташкилотга айлантиришни таклиф қилди
Ушбу таклиф мамлакат ташқи ишлар вазиридан чиққан.
НАТО глобал ташкилотга айланиши керак. Бу ҳақда Буюк Британия ташқи ишлар вазири Элизабет Трасс маълум қилди.
“Бизга глобал НАТО керак. Аммо мен бошқа минтақа давлатларини қўшиш орқали ташкилотни кенгайтириш тарафдори эмасман. Мен НАТОнинг глобал таҳдидларни ҳал қилиши лозимлигини назарда тутяпман”, – деган у.
Шу билан бирга у альянснинг очиқ эшиклар сиёсатининг дахлсиз эканини айтган. Бундан ташқари, Трасснинг сўзларига кўра, Евроатлантика ва Ҳинд-Тинч океани минтақаси хавфсизлиги НАТО учун бирдек муҳим. Шу сабабли ТИВ раҳбари Япония ва Австралия каби давлатлар билан ҳамкорликни кучайтириш зарурлигини таъкидлаган.
Аввалроқ Швеция ва Финляндия ёзда НАТОга кириши тўғрисида хабар берилганди.
