Чироқчида сел оқибатида 2 та уйни сув босди
Ҳолат бўйича ФВБ маълумот берди.
Ижтимоий тармоқларда Қашқадарё вилоятининг Чироқчи ва Китоб туманларида сел келиши билан боғлиқ видеолар тарқалди. Ҳолат юзасидан вилоят Фавқулодда вазиятлар бошқармаси расмий изоҳ берди.
Қайд этилишича, сел Чироқчи туманининг “Чамбул”, ва “Галабек” қишлоқларида, Китоб туманининг “Аёқчи” қишлоғида кузатилган. Ушбу ҳолатлар бўйича масъуллари манзилларда қишлоқ фаоллари билан биргаликда ўрганиш ишларини олиб борган.
Маълум бўлишича, қишлоқларнинг ички йўл ёқасидаги йўналтирувчи сув ариқлари тупроқ ва чиқиндилар билан тўлиб қолиши натижасида сел сувлари йўллардан тошиб, шу каби ноқулайликларни келтириб чиқарган.
Сел оқибатида фақатгина Чироқчи туманида 2 та яшаш хонадон ҳовлисида сув тўпланиб қолган.
“Ҳеч бир бино иншоотларга зиён етмаган. Вилоят қутқарув хизматининг жойларда содир бўлган табиий офат оқибатларини бартараф этиш бўйича қўнғироқларни қабул қилиш маркази фаолият юритмоқда”, — дейилади хабарда.
