CNN: АҚШ Евроиттифоқнинг Украина бўйича позицияси ўзгаришидан хавотирда
Бунга газ танқислиги сабаб бўлиши мумкин.
АҚШ президенти администрацияси газ танқислиги ортидан ЕИнинг Украина бўйича позициясини ўзгартиришидан хавотирда. Бу ҳақда CNN телеканали хабар берди.
Телеканал билан суҳбатлашган Оқ уйдаги манбалар келаётган қишда иситиш ва корхоналар фаолияти учун газ етишмовчилиги оммавий норозиликка олиб келишидан хавотир билдирган. Бунинг ортидан Европа давлатлари Россияга қарши санкциялар сиёсатидан воз кечиши мумкин.
Ушбу вазият фонида Вашингтон Евроиттифоқни энергетика билан таъминловчи муқобил манбаларни қидирмоқда. Бундан ташқари, иттифоқ давлатлари билан қалин дипломатик мулоқот сақланиб қолган.
CNN’нинг қайд этишича, ҳозирча парчаланишнинг олди олинган, аммо ҳаво совуши билан вазият кескин ўзгариши мумкин. Бунда ҳал қилувчи омил об-ҳаво бўлади — телеканал қиш мавсуми нисбатан илиқ ўтган тақдирда Европа мавжуд ресурслар билан инқироздан чиқиб кетишини таъкидлаган.
Аввалроқ Европа давлатлари газ истеъмолини камайтиришга келишиб олганди.
