“Депутатлик қилолмайдиган шароитда ишлаб бўлмайди”
Расул Кушербаев ортидан яна бир депутат ишдан кетишга қарор қилди.
Аввалроқ Олий Мажлис Қонунчилик палатаси депутати Расул Кушербаев ўзининг Парламентдаги фаолиятини тўхтатганини маълум қилганди. Унинг ортидан Нуриддин Зайнитдинов ҳам маҳаллий кенгаш депутатлигидан кетишга қарор қилди.
“Дўстимиз, депутат Расул Кушербаев билан бўлган ҳолатни қоралайман. Қачонгача депутатлар оғзини ёпиш, қасддан уларни позициясини билдиришига қаршиликлар бўлади?
Гапирма! Индама! Аралашма! Қачонгача бундай гапларни эшитамиз?! Депутатнинг гапиришдан бошқа нимаси қолмоқда? Энди шунгаям йўл берилмаса... Хуллас Расул Кушербаевни тўлиқ қўллаб-қувватлайман”, — деган Зайнитдинов.
Депутатнинг ёзишича, унинг ўзига ва оиласига бир неча маротаба босим қилинган.
“Депутат бўлиб, эмин-эркин депутатлик қилолмайдиган шароитда ишлаб бўлмайди. 2022 йилнинг ўзида 2-3 маротаба менга бўлган босимлар ва ноқонуний ишларнинг айбдорларига шу кунгача чора ҳам кўрилмади.
Оиламгача, қариндошларимгача таъқиб ва босим қилишга боришди... Мен ҳам маҳаллий Кенгаш депутатлигидан кетишга қарор қилдим”, — дея пост қолдирган у Телеграм саҳифасида.
