Энг ёмони ҳали олдинда, Россия бутун Украина устидан назоратни қўлга олмоқчи – Макрон
Франция Президенти Путин билан телефон орқали мулоқот қилди.
Россия президенти Владимир Путин франциялик ҳамкасби Эммануел Макрон билан телефон орқали мулоқот қилди. Бу ҳақда “Gazeta.ru” нашри ёзмоқда.
Кремль раҳбарининг сўзларига кўра, Россия қўшинлари Украина хавфсизлик бўлинмаси ва шахсий таркиби билан биргаликда Запорожье атом электр стансиясининг нормал режимда ишлашини таъминлашда давом этмоқда. Россия Федерацияси Қуролли Кучлари Чернобил АЕСни ҳам назорат қилади.
Путиннинг таъкидлашича, Киев Мариупол ва Волноваха гуманитар йўлаклари бўйича эришилган келишувларни ҳалигача бажармаяпти. У, шунингдек, Москва видеоконференция форматида ёки учинчи давлатда учрашув ўтказишга қарши эмаслигини айтган.
Путиннинг қўшимча қилишича, Россия Федерацияси билан мулоқотни давом эттириш учун Киев барча “Россияга маълум бўлган талабларни” бажариши шарт.
Эслатиб ўтамиз, аввалроқ Путин Макронга Киевга ракета ҳужумлари ҳақидаги маълумотлар ёлғон эканини айтганди.
Макроннинг сўзларига кўра эса энг ёмони ҳали олдинда, Путин бутун Украина устидан назоратни ўз қўлига олмоқчи.
