Эрон АҚШ билан ядро келишувига эришишга яқин
Бу ҳақда мамлакат ташқи ишлар вазири маълум қилди.
Эрон Вашингтон билан ядро келишувининг имзоланишига яқин турибди. Бу ҳақда мамлакат ташқи ишлар вазири Амир Абдуллохиян БMТ бош котиби Антониу Гутерриш билан телефон мулоқотида айтиб ўтди.
"Биз музокараларда келишувга эришишга яқинмиз. Бизнинг таклифларимиз ЕИ орқали америкаликларга етказилди ва эндиликда тўп улар томонида", — деган вазир.
Маълумот ўрнида: 2015 йилда Эрон ва АҚШ, Буюк Британия, Германия, Франция, Россия ҳамда Хитой ўртасида "Ҳамкорликдаги умумий ҳаракатлар режаси" имзоланган. Унга кўра, Теҳрон ядро қуроли ишлаб чиқишдан воз кечиши, Ғарб эса иқтисодий санкцияларни бекор қилиши лозим эди. Аммо 2018 йилда АҚШ бу келишувдан чиқиб кетди.
Жозеф Байден АҚШ президентига айлангач, келишувни қайтиб тиклаш ташаббуси билан чиқди. 2021 йилдан бошлаб Венада саккиз раундли музокаралар ўтказилди. 11 март куни томонлар ташқи факторлар туфайли танаффус олди. Унга асосий сабаб қилиб Россиянинг Украинадаги ҳарбий операцияси кўрсатилмоқда. Бунга қадар музокаралар финал босқичига чиққан ва февраль охирида якунланиши керак эди.
Аввалроқ Эрон АҚШ санкцияларининг бекор қилинишини талаб қилганди.
