Эртадан янги телеканал ўз дастурларини бошлайди
Унда Тошкент вилояти ҳаётига оид кўрсатув ва эшиттиришлар эфирга узатиб борилади.
Президент Шавкат Мирзиёевнинг 2021 йил 18 ноябрдаги "Тошкент вилояти телерадиоканалини ташкил этиш тўғрисида"ги қарори ижросига мувофиқ, Ўзбекистон миллий телерадиокомпанияси тизимида Тошкент вилояти телерадиоканали – "Nurafshon TV" ўз фаолиятини бошлайди.
Унда ҳудуднинг ижтимоий-сиёсий, социал-иқтисодий ва маданий-маърифий ҳаётида рўй бераётган ислоҳотлар, фаровонлик, тараққиёт ва бунёдкорлик йўлида олиб борилаётган кенг кўламли ишлар ҳамда яратилган имкониятлар ҳақида туркум телелавҳалар берилади.
Шунингдек, ҳудуднинг тарихи, маданияти, санъати, адабиёти ва урф-одатлари, бой табиати, сўлим гўшалари ва туризм салоҳиятини акс эттирувчи, уларни ўрганиш, асраб-авайлаш ва кенг тарғиб қилишга йўналтирилган кўрсатув ва эшиттиришлар тайёрланади.
Шу билан бирга, давлат ва нодавлат телерадиокомпаниялар, ахборот агентликлари, шунингдек, халқаро ташкилотлар билан ахборот алмашиш бўйича самарали ҳамкорлик йўлга қўйилади.
Телеканал расман эртага, 17 январь куни 9.00 дан ўз дастурларини бошлайди. Эфир сеткаси туну кун, 24 соат учун узлуксиз тарзда тузилган.
