Фарғонада сохта ИИБ ходими ушланди
У судланаётган фуқарони 1,5 минг долларга озодликка чиқармоқчи бўлган.
Фарғона вилоятида ўзини ИИБ ва банк ходими сифатида таништирган фирибгар ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, Департаментнинг Фарғона вилояти бошқармаси томонидан ИИБ ходимлари билан ҳамкорликда тезкор тадбир ўтказилган. Унда фуқаро Н. Х. фуқаро М.га ўзини Тошкент шаҳар ИИБ ходими деб таништириб, суд органларида иши кўрилаётган турмуш ўртоғи Б.ни 1500 АҚШ доллари эвазига озодликка чиқариб беришни ваъда қилиб, шундан 1000 АҚШ долларини олиб, яна 500 АҚШ долларини олган вақтида ашёвий далиллар билан ушланган.
Бундан ташқари, Н. Х. бошқа бир фуқаро Н. Қ.га Тошкент шаҳрида банк филиалида ишлашини айтиб, имтиёзли шартлар асосида кредит олиб бериш эвазига унинг 4,9 млн сўмини қўлга киритганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
