Финляндия бугун НАТОга қўшилишини эълон қилади — Reuters
Шундан кейин Швеция ҳам ушбу қарорини маълум қилади.
Финляндия президенти Саули Нийнистё пайшанба куни НАТОга аъзолик аризасини топширишни расман эълон қилади. Бу ҳақда Reuters хабар берди.
Финнлардан сўнг Швеция ҳам бу бўйича қарорини ошкор қилиши кутилмоқда. Агентликнинг беш нафар номи сир қолишини истаган дипломатларга асосланиб хабар беришича, Хельсинки ва Стокгольм альянсга ўта тезкор қабул қилинади.
Ҳар икки давлат ҳам анчадан буён НАТО билан кенг қамровли алоқалар ўрнатган ва унинг тартибларига мослашиши қийин кечмайди. Улар кейинги ҳафтанинг ўзидаёқ аъзолик аризасини топширади.
НАТО вакиллари Финляндия ва Швеция яқин ҳафталарда альянс аъзосига айланишини таъкидлаган. Аммо уларнинг тўлақонли ва расмий иштирокчига айланиши учун бир йил вақт керак. Бу давр ичида ҳарбий блок давлатлари парламентлари ушбу икки мамлакат аъзолиги тўғрисидаги қарорни ратификация қилади.
Швеция икки аср, Финляндия эса 80 йил нейтрал мақомни сақлаб келди. Россиянинг Украинага кириб келгунига қадар ҳар икки давлат фуқароларининг катта қисми ҳарбий блокларга аъзо бўлишга қарши бўлган. аммо 24 февралдан сўнг вазият кескин ўзгарди:сўнгги сўровномаларга кўра, финнларнинг 76 фоизи НАТОга қўшилишга рози.
АҚШ, Буюк Британия ва бошқа Ғарб давлатлари Хельсинки ва Стокгольмнинг альянсга расман қўшилишига қадар хавфсизлик кафолати тақдим этишга тайёрлигини маълум қилди.
Аввалроқ Швеция ва Финляндия НАТОга шу йилнинг ўзидаёқ қўшилиши тўғрисида хабар берилганди.
