G7’нинг Украина бўйича умумий баёноти қабул қилинди
Унда 2022 йилда Киевга 2.8 миллиард доллар гуманитар ёрдам етказиб бериш тилга олинган.
“Катта еттилик” Украина бўйича умумий баёнот қабул қилди. Бу ҳақда “ТАСС” хабар берди.
Унда G7 давлатлари Украинани қўллаб-қувватлашини, унинг суверенитети ва ҳудудий яхлитлигини ҳурмат қилиши таъкидланган. Улар Киев можаро ҳал этилишида ўз манфаатларига кўра ҳаракат қилиши, унга ташқаридан ҳеч қандай босим ўтказмаслик зарурлигини қайд этган.
“Еттилик” 2022 йилда 2.8 миллиард долларлик гуманитар ёрдам ажратиши белгиланган. Бундан ташқари, ушбу давлатлар Украинанинг тикланишида ёрдам кўрсатишини эълон қилган.
G7 етакчилари Россияни украин ғалласининг портлардан эркин экспорт қилинишига қаршилик қилмасликка чақирган. Шунингдек, улар Киевга маълумотлар алмашинуви, разведка, ахборот ва денгиз хавфсизлиги бўйича ҳамкорликни кенгайтиришга тайёрлигини билдирган.
Аввалроқ «Катта еттилик» Россия олтинидан воз кечмоқчи эканлиги тўғрисида хабар берилганди.
