Гаитида 7,2 магнитудали зилзила юз берди. Камида 304 киши ҳалок бўлган
Гаитида 14 август, шанба куни 7,2 магнитудали зилзила юз берди. Унинг кетидан кетма-кет афтершоклар, хусусан, 5,2 магнитудали такрорий ерости силкинишлари кузатилган.
Зилзила Гаити жануби-ғарбидаги Сен-Луи-дю-Сюд шаҳри яқинида юз берган. Унинг эпицентри 10 километр чуқурликда бўлгани айтилмоқда. Сўнгги маълумотларга кўра, офат оқибатида камида 304 киши ҳалок бўлган, 1,8 мингдан ортиқ тан жароҳати олган; бедарак йўқолганларнинг аниқ сони маълум эмас, қурбонлар сони ортиши мумкин.
АҚШ Геология хизмати шанба куни юз берган ерости силкинишларини «қизил» даража билан баҳолаган — бу даража зилзиланинг «жиддий инсоний йўқотишлар» ва сезиларли талофатлар келтириб чиқариши мумкинлигини билдиради.
АҚШ Океанлар ва атмосфера тадқиқотлари миллий бошқармаси Гаитидаги зилзиладан сўнг цунами юзага келиши мумкинлигидан огоҳлантирган, бироқ кейинроқ цунами хавфи бекор қилинган.
