Газ қудуқларидан истеъмолчигача бўлган тизим тўлиқ рақамлаштирилади
Президент куз-қиш мавсумида аҳолига 10 млрд куб метр табиий газ етказиб бериш бўйича кўрсатма берди.
Ўзбекистонда куз-қиш мавсумида аҳолига 10 миллиард куб метр табиий газ етказиб берилади. Бу ҳақда президент Шавкат Мирзиёев иштирокида ўтказилган куз-қиш мавсумида иқтисодиёт тармоқлари ва ижтимоий соҳа муассасаларининг барқарор ишлашини таъминлаш бўйича йиғилишда маълум қилинди.
Қайд этилишича, Ҳукумат қарори қарори билан, ҳар бир вилоят, туман ва йўналишлар кесимида алоҳида режа-жадваллар ва чора-тадбирлар ишлаб чиқилиб, манбалари белгиланган.
Таъкидланишича, аҳолини, аввало, электр энергияси билан узлуксиз таъминлаш чоралари кўрилмоқда.Бунинг учун ИВ чоракда 21 миллиард киловатт соат, келгуси йил бошида қарийб 22 миллиард киловатт соат электр ишлаб чиқариш режалаштирилган.
Шунингдек, куз-қиш мавсумида аҳолига 10 миллиард куб метр табиий газ етказиб берилиши белгиланган.
Давлат раҳбари бу жараёнда исрофга йўл қўймаслик учун газ қудуқларидан истеъмолчигача бўлган тизимни тўлиқ рақамлаштириш бўйича кўрсатма берди.
Табиий газ тармоғидан узоқдаги қишлоқ ва овуллар, ижтимоий объектларга суюлтирилган газ ва кўмир етказиб берилади. Президент қайси ҳудудга яна қўшимча захира керак бўлса, таъминлаб берилишини таъкидлади.
“Барча тармоқ ва ҳудуд раҳбарлари бу масалада масъулиятини икки карра ошириб, аҳолини рози қилиши, ҳеч бир мурожаатни эътиборсиз қолдирмасдан, тезкор ҳал этиши лозим”, — дейди Шавкат Мирзиёев.
Энергетика вазирлигига аҳолининг энергия манбалари билан таъминланганлик ҳолатини реал вақт тартибида мунтазам назорат қилиб бориш топширилди. Юзага келадиган муаммоларни бартараф этишда «колл-марказ»лар ва ҳудудий ишчи гуруҳлар фаолияти муҳим экани қайд этилди.
