Гутерриш: Хавфсизликка мулоқот орқали эришилади, ядро қуроли билан эмас
Аввалроқ БМТ бош котиби дунё давлатларини ядро қуролидан воз кечишга чақирганди.
Ҳеч қайси давлатнинг хавфсизлиги ядро қуроли эвазига таъминланиши мумкин эмас. Бу ҳақда БМТ бош котиби Антониу Гутерриш маълум қилди.
“Хиросима ва Нагасакига қарши ядро қуролининг қўлланилиши гуманитар ҳалокатга сабаб бўлди. У инсоният ўзини ўзи йўқ қилиши мумкин бўлган янги даврни бошлаб берди. Ҳақиқий хавфсизлик ядро қуроли эвазига таъминланиши мумкин эмас. Унга мулоқот, музокаралар, ўзаро ҳурмат ва халқаро ҳуқуққа ҳурмат асосида эришилади”, – деган бош котиб Нагасакидаги чиқишида.
Бугун Япониянинг Нагасаки шаҳрига атом бомбаси ташланганига 77 йил тўлди. 1945 йил 9 август куни АҚШ ҳарбий-ҳаво кучлари ушбу шаҳарга ядро бомбасини ташлаган.
Аввалроқ Гутерриш дунё давлатларини ядро қуролидан воз кечишга чақирганди.
