Ҳамма рус газидан воз кечаётган пайтда Венгрия "Газпром" билан шартнома имзолади
Будапешт Россиядан газ импортини оширади.
Венгрия Россия билан қўшимча газ етказиб бериш бўйича келишувга эришди. Бу ҳақда мамлакат ҳукумати расмий вакили Золтан Ковач маълум қилди.
"Газпром" билан тузилган янги шартномага биноан, 1 сентябрдан кунига қўшимча 5.8 миллион кубометр газ импорт қилинади.
Венгрия ТИВ раҳбари Петер Сийяртонинг сўзларига кўра, келишув 2 ойга тузилган. Газ эса Сербия орқали етказиб берилади.
Ўтган йили Будапешт Москва билан узоқ муддатли газ келишувига эришганди.
Венгриянинг Россия газига қарамлиги кучли. У Евроиттифоқдаги Москва энергоресурсларининг эмбаргосига қарши турган асосий давлат саналади.
Аввалроқ Венгрия бош вазири Виктор Орбан РФга қарши санкциялар сиёсатидан воз кечишга чақирганди.
