Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақидаги қонун Сенат томонидан маъқулланди. Ушбу ўзгаришлар қурилиш майдонларида атмосфера ифлосланишининг олдини олишга қаратилган.
Амалдаги шаҳарсозлик қоидаларида чанг ва бошқа ифлослантирувчи моддалар миқдорини камайтириш учун махсус сув тизимларидан фойдаланиш белгиланган. Бироқ, шу кунгача ҳавони ифлослантириш учун аниқ жавобгарлик чоралари белгиланмаган эди.
Эндиликда, атмосфера ифлосланиши белгиланган меъёрлардан ошса, ҳуқуқбузарларга 10 базавий ҳисоблаш миқдори (БҲМ) миқдорида жарима солинади. Агар қонунбузарлик бир йил ичида такрорланса, жарима 50 БҲМгача оширилади.
Мазкур тартибга риоя этилишини назорат қилиш ва қоидабузарларни жавобгарликка тортиш вазифаси Давлат экологик назорат инспекцияси зиммасига юклатилган.