Ўзбекистон Қатарда «Толибон» ҳаракати билан музокара ўтказди
Ўзбекистон, Туркманистон ва Россия дипломатлари Қатарда «Толибон» ҳаракатининг сиёсий масалалар бўйича комиссияси раҳбари билан музокара ўтказди.
Бу ҳақда «Parstoday» хабар берди.
«Толибон» ҳаракати вакилининг матбуотга билдиришича, ҳаракат етакчиларидан бири мулла Абдул Ғани Барадар Қатарда Туркманистон ташқи ишлар вазирининг ўринбосари Вепа Хаджиев ва Ўзбекистон президентининг Афғонистон бўйича махсус вакили Исматулла Иргашев билан учрашган. Бу учрашувда томонлар Афғонистондаги вазиятни муҳокама қилишган.
Ҳаракат вакили Забиҳуллоҳ Мужоҳид учрашувда минтақавий масалалар, жумладан, Афғонистон ва Марказий Осиё республикалари ўртасидаги савдо муҳокама қилинганини таъкидлаган. Мулла Абдул Ғани Барадар ва Хожиев, шунингдек, икки томонлама муносабатлар, чегара муаммолари, иқтисодий лойиҳалар ва Туркманистоннинг Афғонистондаги дипломатик ваколатхоналари хавфсизлиги масалалари юзасидан фикр алмашган.
Бундан ташқари, «Толибон» ҳаракати вакили Соҳеил Шоҳин ўзининг Twitter саҳифасида Мулла Абдул Ғани Барадар Россия президентининг Афғонистон бўйича махсус вакили Замир Кабулов билан Афғонистон масаласини ҳам муҳокама қилганини қайд этган.
