60 ёшли Улуғбек муқаддам содир қилган жиноятлари учун бир неча бор суднинг қора курсисига ўтириб, жазо ўтаган. Қамоқхонадан чиққач, ўзига тўғри хулоса чиқариш ўрнига спиртли ичимликларга ружу қўяди. Мастликдаги “ҳурмача қилиқлар”и сабаб қўшнилари ва ҳатто, ўз фарзандлари ҳам ундан узоқлашади.
Кундалик жанжаллардан безиган кичик ўғил алоҳида уйга чиқиб кетади. Бебош отанинг ҳархашасини кўтариш катта ўғилга қолади.
Жорий йилнинг 8 май куни кичик ўғилга акаси қўнғироқ қилиб, отаси яна ичиб жанжал қилаётгани, маҳалла фуқаролар йиғини раиси билан ҳам тинчлантира олмаётганини айтиб, ёрдам сўрайди. Укаси зудлик билан етиб келади. Ака-ука бир амаллаб маст отасини уйига киргизиб, ётқизишади.
Ака укасига ўзи билан келган дўстининг машинасида кутиб туришини айтиб, отасининг ухлаганига ишонч ҳосил қилиш учун уйга киради. Ўғилларининг бу ҳаракатини ҳақорат деб қабул қилган ота ичкилик таъсирида ошхона пичоғи билан ўғлининг кўксига санчийди. Етказилган оғир жароҳат туфайли ўғил Тиббиёт бирлашмасининг жонлантириш бўлимида вафот этади.
Жиноят ишлари бўйича Боғот туман суди қотил отага 10 йилга озодликдан маҳрум этиш жазосини тайинлади.
Аввалроқ Қашқадарёда эркак ўз ўғлини ўлдириб қўйгани ҳақида хабар берилганди.
Муножат Валиева