ИШИД Афғонистон қўшниларига хавф соладими? Пентагон вакили жавоб берди

 

АҚШ мудофаа вазирининг сиёсий масалалар бўйича ўринбосари Колин Кол ИШИДнинг Афғонистондаги ҳолати тўғрисида маълумот берди.

 

Унга кўра, АҚШ разведка хизматлари ушбу террорчи ташкилот Афғонистон ташқарисидаги давлатларга 6-12 ой ичида ҳужум уюштириши мумкин. Ўз навбатида, "Ал-Қоида" 1-2 йил ичида фаоллигини ошириши қайд этилган.

 

Кол Покистоннинг Афғонистон бўйича позициясига ҳам тўхталиб ўтди.

"Исломобод Афғонистонни террорчилар учун бошпана бўлишини истамайди. Шунинг учун у АҚШ билан терроризмга қарши курашда ҳамкорликни давом эттирмоқда. Хусусан, мамлакат ҳаво ҳудудидан фойдаланишга рухсат беряпти", — деган амалдор.

 

Шунингдек, "Толибон"нинг ИШИДга қарши кураши масаласи қайд этилди. Колнинг фикрича, толибларнинг террорчиларга қарши кураш истаги мавжуд.

 

Бундан аввал Покистон толибларга ИШИД га қарши курашда ёрдам бераётгани ҳамда АҚШ ҳаво ҳужуми натижасида "Ал-Қоида" раҳбарларидан бири ўлдирилгани хабар қилинганди.

 

Жаҳонгир Қўзиев