Жиззахда бир гуруҳ йигитлар муштлашди
Ҳолат юзасидан расмий муносабат билдирилди.
Ижтимоий тармоқда Жиззах вилоятининг Шароф Рашидов туманида бир гуруҳ йигитлар муштлашгани акс этган видеолар тарқалмоқда. Ҳолат юзасидан вилоят ИИБ расмий муносабат билдирди.
Маълум бўлишича, 27 сентябрь куни 17:45 ларда Шароф Рашидов туманида яшовчи 37 ёшли эркак, унинг 33 ёшли укаси ва 18 ёшли йигит ўзаро жанжаллашиб, бир-бирларига тан жароҳати етказишган.
Оқибатда 37 ёшли фуқаро “бош мия чайқалиши” ташхиси билан нейрохирургия бўлимига ётқизилган. Унинг укаси ва 18 ёшли йигит биринчи тиббий ёрдам олишган.
Ҳозирда ҳолат юзасидан туман ИИБ ҳузуридаги тергов бўлими томонидан терговга қадар текширув олиб борилмоқда.
