Қайд этилишича, Жиззах вилоятида 4 январга ўтар кечаси иккита ёнғин содир бўлди.
Бу ҳақда вилоят ФВБ матбуот хизмати хабар берди.
3 январь куни тунги соат 23:33 ларда Жиззах шаҳар "Маданият" маҳалласида жойлашган хонадонларнинг бирида ёнғин содир бўлганлиги тўғрисида хабар келиб тушган.
Воқеа жойига шаҳар ФВБнинг 2 та ёнғин-қутқарув бўлинмаси юборилган.
Қутқарувчилар айтилган манзилга соат 23:38 да етиб борган ва ёнғин соат 00:02 да батамом ўчирилган.Ёнғин натижасида хонадоннинг 30 квадрат метр майдонда том-шифт қисми ёниб зарарланган. Жабрланганлар йўқ.
Дастлабки суриштирув натижаларига кўра, электр симларининг қисқа туташуви ёнғинга сабаб бўлган. Кўрилган моддий зарар миқдори аниқланмоқда.
Бундан ташқари, 4 январь куни соат 00:30 ларда Бахмал тумани “Файзобод” МФЙда жойлашган хонадонларнинг биридан ёнғин содир бўлаётгани тўғрисида 101 қисқа рақами орқали хабар келиб тушган.
Тезкор ҳаракатлар натижасида ёнғин соат 00:45 да батамом ўчирилган ва 42 квадрат метр майдондаги моддий бойликлар ёнғиндан сақлаб қолинган. Тан жароҳати олганлар йўқ.
Жиззах вилояти Фавқулодда вазиятлар бошқармаси юқоридаги каби кўнгилсиз ҳодисаларнинг олдини олиш мақсадида фуқароларни ёнғин хавфсизлиги қоидаларига қатъий риоя қилишга чақирди.
Эслатиб ўтамиз, аввалроқ Жиззахда юк машинаси ёниб кетгани ҳамда ушбу вилоятда уй оғилхонасида ёнғин чиқиб, 300 дона прессланган сомон ёниб кетгани ҳақида хабар берилганди.
Чўлпоной Аҳмедова