Шимолий Кореяда мамлакатнинг ядро мақоми расман белгиланган декрет қабул қилинди. Бу Пхеньянга ташқи агрессияга учраган тақдирда ядро зарбалари бериш имкониятини тақдим этади.
Бундан ташқари, Ким Чен Ин Корея яриморолини ядродан ҳоли ҳудудга айлантириш бўйича музокаралардан ҳам воз кечган. Юқоридаги декрет Олий халқ мажлисининг 7 сентябрдаги йиғилишида қабул қилинган. У “ядро қуроли бўйича сиёсат” деб аталади. Унда КХДРнинг ядро қуролидан фойдаланиш бўйича сиёсати “ҳужумкор” деб аталган.
Шунингдек, Ким Чен Инга ҳужум уюштирилган тақдирда ҳам ушбу турдаги қуролдан фойдаланишга рухсат берилган. Шу билан бирга бундай ҳолатлар “ташқи агрессияга қарши энг сўнгги чора” сифатида белгиланган.
КХДР раҳбари мамлакат ҳеч қачон ядро қуролидан воз кечмаслигини маълум қилган. Унинг сўзларига кўра, АҚШ Шимолий Корея режимини ағдаришни мақсад қилган. Ким Чен Ин ҳатто 100 йиллик санкциялардан кейин ҳам таслим бўлмаслигини айтган.