Қашқадарё вилоятининг Косон туманида қабристонга тегишли ер майдонини пуллаган мансабдорлар аниқланди.
Маълум бўлишича, мазкур ҳаракат Косон тумани ер участкалари бериш (реализация қилиш) масалаларини кўриб чиқувчи комиссия мансабдор шахслари томонидан содир этилган. Улар қонун талабларига зид равишда туман марказида жойлашган “Эшони Косон” қабристони ҳудудидан фуқаро ва тадбиркорларга 0,33 гектар ер майдонини ноқонуний ажратиб, ушбу қабристонга тегишли ер майдонида кушхона, савдо дўкони ва омборхона бинолари қурилишига йўл қўйишган. Шу тариқа давлат ва жамият манфаатларига 146 млн сўм миқдорда зарар етказилган.
Мазкур ҳолат юзасидан вилоят прокуратураси томонидан Жиноят кодексининг 205-моддаси 1-қисми, 209-моддаси 2-қисми «а» банди ва 229-4-моддаси 2-қисми “а” банди билан жиноят иши қўзғатилган.