Россия ташқи ишлар вазири Сергей Лавров Беларус президенти Александр Лукашенко билан бўлиб ўтган учрашув якунлари бўйича маълумот берди. Унинг сўзларига кўра, икки давлат Украинадаги ҳарбий операция давомида қандай мақсадларга эришиш кераклиги борасида умумий позицияга эга.
Сергей Лавровнинг айтишича, суҳбат чоғида у Беларус президенти билан ҳарбий амалиётлар доирасида Украинадаги вазият қандай ривожланаётгани ҳақида фикр алмашган.
“Бу ерда қандай мақсадларга эришиш кераклиги биламиз. Биз Россия ёки Беларусга хоҳ у Украина бўлсин, хоҳ бошқа давлатнинг таҳдидларига йўл қўймасликни таъминлаш борасида ягона позицияга эгамиз”, — деди вазир.
Жаноб Лавров Минскка икки давлат ташқи ишлар вазирликлари ҳайъатларининг қўшма мажлисида иштирок этиш учун ташриф буюрди. Ташриф доирасида Александр Лукашенко ва Беларус ташқи ишлар вазири Сергей Алейник билан учрашувлар бўлган. Музокаралар якуни бўйича 2023 йилга мўлжалланган ТИВлараро маслаҳатлашувлар режаси ва ҳукуматлараро меморандум ҳамда йиғилиш қарори имзоланган.
Россия ва Беларус 2021 йил сентябрида интеграция дастурлари бўйича келишиб олган. Ўтган йилнинг октябрь ойида Александр Лукашенко ва Владимир Путин Беларус ва Россиянинг қўшма ҳарбий гуруҳини тузиш бўйича келишувга эришганди. Беларус Мудофаа вазирлигининг хабар беришича, гуруҳдаги РФ контингенти 9 минг кишидан бироз камроқ.
Кремль Владимир Путин Александр Лукашенкони Украинадаги можарода иштирок этишга мажбурламаслигини айтди. Пентагон ҳам Беларуснинг можарога киришмоқчи эканлиги ҳақида ҳеч қандай аломат йўқлигини айтган.