"Маҳаллий аҳолига нисбатан мажбурлов бўлган-бўлмаганига аниқлик киритиш мақсадида ички текширув ўтказилмоқда” — Эрбол Султанбаев
Қирғиз Республикаси Президенти Садир Жапаров кортеж машинасида ўтаётган вақт аҳоли уни байроқлар билан кузатиб қолган.
Ижтимоий тармоқларда Қирғизистон президенти Садир Жапаров кортежи ўтиб кетаётган вақтда аҳоли йўл четида туриб байроқларни ҳилпиратаётгани акс этган видеотасвир тарқалди.
Айтишларича Жалолобод вилояти "Барпи" қишлоғида ишлаётган ишчиларни шу куни кўчага чиқиб давлат раҳбари ўтаётган вақтида байроқларни ҳилпиратишга мажбур қилган.
Бу ҳолат ижтимоий тармоқ фойдаланувчилари орасида турли баҳс-мунозарага сабаб бўлган. Аксарият фойдаланувчилар ҳокимият вакилларининг бундай хатти-ҳаракатидан норози эканини билдирган. Маҳаллий аҳолини кўчага чиқишга мажбурлаган амалдорларни жазолашни талаб қилишган.
"Садир Жапаров бу каби ташаббусларга қарши. Барча ҳолатлар, жумладан, маҳаллий аҳолига нисбатан мажбурлов бўлган-бўлмаганига аниқлик киритиш мақсадида ички текширув ўтказилмоқда”, — деди президент матбуот котиби Эрбол Султанбаев.
Аввалроқ Президент Шавкат Мирзиёев 6 Марказий Осиё давлатлари раҳбарларининг Маслаҳат учрашуви доирасида Қирғиз Республикаси Президенти Садир Жапаров билан музокара ўтказгани ҳақида хабар берилганди.
Муножат Валиева
