Автосаноат раҳбари тез орада автомобилга навбат йўқ бўлишини эълон қилди
Андижоннинг ўзида бу йил 250−300 млн долларлик тўртта янги завод қурилиши айтилмоқда.
«Ўзавтосаноат» раиси Шавкат Умурзоқов автомобилни навбатсиз олиш учун «шапка»ни қонунийлаштиришга қарши эканини маълум қилди. Унинг фикрича, навбатлар муаммосини фақат ишлаб чиқаришни кўпайтириш билан енгиш мумкин. Компания 2023 йилда ярим миллион автомобиль ишлаб чиқаришни режалаштирмоқда.
Умурзоқов қўшимча пул тўлаб, автомобилни навбатсиз олиш имкони яратилиши, яъни халқ орасидаги «шапка»ни қонунийлаштириш мумкинлиги борасида шундай дейди:
«Мен бу таклифга қаршиман, нотўғри нарса. Бекорга ишлаб чиқаришда 500 минг билан чегараланмаймиз демадим. Автомашиналар навбати бутун дунёда бор. Мен бу билан уни тўғри ҳам демоқчимасман. Лекин бу нарса [автомобиль етказиб бериш муддатини камайтириш]ни фақат машина кўп ишлаб чиқариш билан енгамиз. Ўзимизда ишлаб чиқарилаётган машинани тезроқ олиш учун кўпроқ пул тўланг, десак, нотўғри бўлади»
Унинг айтишича, компания олдида жуда кўп ташқи ва ички муаммолар турибди. Умурзоқов бунга мисол сифатида 2018 йилда бир контейнер нархи 5 минг доллар бўлгани, ҳозир 15 минг долларгача ошганини келтирди.
«Машинамизни қимматлашяпти деймиз, лекин долларга чақсак, шу кунгача арзонлашди. Шунча солиқ тўлаяпмиз, лойиҳаларнинг бир сўмини ҳам давлатдан олмаяпмиз, ўзимизнинг даромадимиз ёки ривожланишимизни кўриб, пулларни ташқи молиявий институтлар беряпти», — деди Шавкат Умурзоқов.
«Андижоннинг ўзида бу йил 250−300 млн долларлик тўртта янги завод қурадиган бўлдик. Бу нима беради? Тасаввур қилинг, 2016 йил 80 минг машина чиққан, 2017 йил 120 минг чиққан. Бугун 330 минг чиқаряпмиз. Бу йил 400 мингдан ошиқ чиқарамиз. Навбат йўқ бўлади, ишонинг, фақат озгина сабр қилинг», — деди «Ўзавтосаноат» раиси.
