Мен ўтмишда омадли бизнесмен бўлганман — Илҳом Алиев "Пандора ҳужжатлари"га муносабат билдирди

Алиев “Пандора”даги ўзига оид ҳужжатлар билан танишганини маълум қилди. Унинг айтишича, ҳужжатлардаги 5 фоиз маълумот ҳақиқатга яқин.

“Тўғрисини айтганда, мен ҳужжатларни тўлиқ ўқимадим. Менга маълумот беришди ва унинг 5 фоизи ҳақиқатга яқин. Қолгани эса ёлғон” , – деган Алиев.

Унинг қўшимча қилишича, президент бўлишидан аввал бизнес билан шуғулланган. Алиев ўзини муваффақиятли тадбиркор бўлганини таъкидлаган. Аммо президент этиб сайланганидан кейин у ўз бизнесини оиласига топширган. Ҳозирда уни президентнинг фарзандлари тасарруф қилади. Улар асосан Озарбайжонга инвестиция киритса-да, аммо баъзи маблағлар хорижга йўналтирилган. Алиев фарзандлари бизнеси “шаффоф ва халқаро даражада текширилиши”ни айтган.

Бундан аввал “Пандора ҳужжатлари"да Илҳом Алиев ва Қиролича Елизавета II номи биргаликда келгани хабар қилинган эди. Шунингдек, унда Гулнора Каримова номи ҳам қайд этилган.

Жаҳонгир Қўзиев