Минск Варшавани афғон қочоқларини Беларус ҳудудига сиқиб чиқаришда айбламоқда
Беларус давлат чегара қўмитаси хабарига кўра, воқеа 18 августда содир бўлган. «БEЛТА» хабарига кўра, полшалик ҳарбийлар бир неча ҳарбий транспортда мигрантларнинг катта гуруҳини чегарагача олиб келиб, куч билан Беларус ҳудудига чиқаришга уринган.
Қочоқлар норозилик билдириш мақсадида Полшада лагерь ташкил қилган.
Минскнинг иддаосига кўра, “Полша ҳукумати ўзининнг ноқонуний ҳаракатларини жаҳон ҳамжамияти олдида оқлаш мақсадида журналистларни чақириб, уларнинг олдида муҳожирларга сув тарқатган”.
26 май куни Беларус Президенти Александр Лукашенко энди унинг давлати Европа Иттифоқининг ғарбий чегараларини кесиб ўтмоқчи бўлган мигрантларга тўсқинлик қилмаслигини эълон қилган эди. Бу Ryanair самолётининг Минскда мажбуран қўндирилгани туфайли ғарб эълон қилган санкцияларга Беларуснинг жавоби бўлди.
Олдинроқ Литва Беларусни юзлаб мигрантларни мамлакат ҳудудига юборишда айблаган, Осиё ва Африка мамлакатларидан Беларус орқали Литвага кириб, ватанига қайтишга рози бўлган ноқонуний муҳожирларга 300 евро миқдорида бир марталик нафақа тарқатган эди.
Шарофат Маҳмудова
