Мубашшир Аҳмад тахаллуси билан танилган диний блогер Алишер Турсуновнинг ҳимоя жамоаси унинг соғлиғи билан боғлиқ жиддий муаммолар сабаб жазони ижро этиш колониясидан озод этилишини талаб қилмоқда.
Адвокат Абдуллоҳ Содиқнинг Kun.uzga маълум қилишича, 2025 йил октябрь ойида 2,5 йилга озодликдан маҳрум этилган Турсунов ҳозирда Навоий вилоятидаги 5-сонли жазони ижро этиш колониясида сақланмоқда. Ҳимоя томонига кўра, маҳкумнинг соғлиғи кескин ёмонлашган ва бу унинг жазони ўташини деярли имконсиз ҳолга келтирган.
Қайд этилишича, Алишер Турсунов узоқ йиллардан буён II тур диабет билан яшаб келган. Қамоқхона шароитида ушбу касаллик жиддий асоратларни келтириб чиқарган: қон босимининг доимий юқорилиги, остеоартрит, юрак-қон томир муаммолари, буйрак фаолиятининг бузилиши ҳамда диабет фонида оёқларда кучли шиш ва некроз белгилари кузатилаётган яралар пайдо бўлган.
Ҳимоя томонининг билдиришича, расмий маълумотларда мунтазам тиббий ёрдам кўрсатилаётгани қайд этилган бўлсада, маҳкумнинг ўзи адвокатлари билан учрашувларда даволаниш фақат тиббий кўриклар ва вақтинчалик оғриқ қолдирувчи инъекциялар билан чекланаётганини айтган.
Шунингдек, соғлиғидаги оғир ҳолатга қарамай, Турсунов ғишт ишлаб чиқариш цехида ишлашга мажбур этилаётгани, кунига 16 соатгача тик ҳолатда бўлиши унинг аҳволини янада оғирлаштираётгани таъкидланмоқда. Икки қаватли каравотда ётишга мажбур бўлиши эса йиқилиш ҳолатларига ҳам олиб келгани айтилмоқда.
Ҳимоя томони Жиноят кодексининг 75-моддасига таяниб, Турсуновни оғир касалликлар рўйхатига киритилган ҳолатлар асосида жазодан озод этиш зарурлигини билдирган.