Наманганда 100 га яқин бола доридан заҳарлангани айтилмоқда

 

Наманган вилоятининг Чуст туманида 90 дан ортиқ бола йод препаратидан заҳарлангани айтилган хабарлар тарқалди. Ҳолат бўйича Соғлиқни сақлаш вазирлиги ҳамда Бош прокуратура расмий муносабат билдирди.

 

Маълум қилинишича, вазирлик Чуст туманидаги мактабгача таълим ташкилотида болалар билан содир бўлган заҳарланиш ҳолати юзасидан керакли чора-тадбирларни амалга оширмоқда. Туман тиббиёт бирлашмасига қабул қилинган болаларнинг барчасига белгиланган стандартлар бўйича даво муолажалари олиб борилмоқда.

 

Уларга якуний ташхис қўйиш мақсадида белгиланган талаблар асосида намуналар олиниб, экспертизадан ўтказилмоқда. Айни пайтда болаларнинг ҳолати қониқарли, улардан 10 нафарининг аҳволи яхшилангани сабабли уйига рухсат берилган.

 

Туманда содир бўлган ушбу ҳолат шахсан Соғлиқни сақлаш вазири томонидан қатъий назоратга олинган.

 

Шунингдек, вояга етмаган болалар заҳарланиши юзасидан прокуратура томонидан терговга қадар текшириш ҳаракатлари олиб борилмоқда. 

 

“Вояга етмаган болалар нимадан заҳарланганлиги ҳали номаълум бўлганлиги сабабли жамоатчиликдан нотўғри ва турли тахминларга асосланган хабарларни тарқатмасликларни сўраб қоламиз. 

 

Чуст туманида фавқулодда ҳолат эълон қилинганлиги ҳақидаги хабарлар ҳақиқатга тўғри келмайди”, — дейилади Бош прокуратура баёнотида.