Наманганда “Матиз” ҳайдовчиси икки кишини уриб юборди
Ҳодиса оқибатида бир нафар фуқаро вафот этган.
Вилоят ИИБ ахборот хизматининг маълум қилишича, воқеа 16 март куни Учқўрғон–Қўғай йўлининг “Тегирмон” МФЙ ҳудудидан ўтган қисмида содир бўлган. “Матиз” ҳайдовчиси ҳаракат хавфсизлигини таъминлай олмай, йўлнинг ўнг томонида ҳаракатланиб бораётган “Некcия” бошқарувчисини ва газ ёнилғиси тугаб қолганлиги сабабли унинг орқасидан суриб кетаётган яна бир фуқарони уриб юборган.
Ҳодиса оқибатида пиёдалардан бири оғир тан жароҳати олиб, шифохонада вафот этган. Унинг шериги мия чайқалиши ташхиси билан касалхонага ётқизилган.
Ҳозирда мазкур ҳолат бўйича жиноят иши қўзғатилган.
