Навоийдаги Бўстон қишлоғида бўрилар кундузи одамларни қўрқитаётгани айтилди
Ҳолат юзасидан вилоят экология бошқармаси муносабат билдирди.
Ижтимоий тармоқларда Навоий вилоятининг Нурота туманидаги Бўстон қишлоғида кундуз куни бўрилар юргани ҳақида хабарлар тарқалди. Ҳолат юзасидан вилоят экология бошқармаси маълумот берди.
Ҳолат Нурота тумани Экология бўлими, Ўзбекистон Овчи ва балиқчилар спорт бирлашмаси Навоий вилоят бўлими ходимлари ҳамда туман ИИБ бўлими томонидан ўрганилган.
Ўрганиш давомида маҳалла оқсоқоллари билан суҳбат ўтқазилганда видеода акс эттирилган бўрилар Нурота туманининг қўшни қишлоқлари, яъни Самарқанд вилояти Қўшработ туманидаги Қўштомғоли, Чиноқ ва Тепалик қишлоқларида содир бўлганлиги аниқланган. Ишчи гуруҳ томонидан ушбу ҳолат бўйича Самарқанд вилояти Қаттақўрғон тумани Экология бўлимига хабар берилган.
“Шунингдек, Нурота туманидаги «Бўстон» МФЙнинг тоғ ҳудудлари атрофида истиқомат қиладиган аҳолига ўзларининг чорва молларини вақтинчалик тоғ ҳудудларга боқиш учун олиб чиқмаслиги тўғрисида тарғибот ва тушунтириш ишлари олиб борилди”, — дейилади хабарда.
