Нега Тоғли Қорабоғ яна нотинч?

 

Сешанба куни Озарбайжон Тоғли Қорабоғда “маҳаллий аксилтеррор чоралари” бошланганини эълон қилди. Мамлакат Мудофаа вазирлиги баёнотида айтилишича, уларнинг мақсади Озарбайжон ҳарбий хизматчилари хавфсизлигини таъминлаш ва минтақада Озарбайжон Республикасининг конституциявий тузумини тиклашдир.

 

“Уч томонлама баёнот қоидаларини таъминлаш мақсадида Қорабоғ иқтисодий районида кенг кўламли провокацияларни бостириш, Арманистон қуролли кучларини ҳудудларимизда қуролсизлантириш ва олиб чиқиб кетиш, уларнинг ҳарбий инфратузилмасини зарарсизлантириш, ҳудудларга қайтган тинч аҳоли хавфсизлигини таъминлаш чоралари бошланди”, — дейилади хабарда.

 

Озарбайжон президенти Илҳом Алиевнинг халқаро масалалар бўйича маслаҳатчиси Ҳикмет Ҳажиев Politico нашрига берган интервьюсида маҳаллий арман аҳолиси бўлажак операция ҳақида СМС-хабарлар орқали огоҳлантирилганини айтди.

 

Озарбайжон армияси ва Россия тинчликпарвар кучлари Шушага кираверишдаги назорат-ўтказиш пунктларида биргаликда навбатчилик қилмоқда. Хусусан, шаҳарга кириш жойларидан бирида Озарбайжон қўшинларининг зирҳли техникалари ва Россия тинчликпарвар кучларининг бронетранспортёрлари ўрнатилган.

 

Озарбайжон Ханкенди, арманлар  Степанакерт деб атайдиган шаҳар Озарбайжон қуролли кучларининг назорати остида. Шаҳарда Қорабоғ армиясини қуролсизлантириш ишлари олиб борилмоқда. Хонкенди атрофидаги баландликларда Озарбайжон қўшинларининг позициялари ўрнатилди.

 

Шаҳарда Қорабоғнинг қурол-яроғ ва ҳарбий техникасини Озарбайжон ҳарбийларига топшириш жараёни давом этмоқда.

 

Озарбайжон матбуоти хабарига кўра, ҳаво ҳудуди Арманистон авиацияси учун ёпиқ. КЛМ Аирлинес авиакомпанияси Озарбайжон ҳаво ҳудуди орқали парвозларни бекор қилганини эълон қилди.

 

“Россия зиддиятли томонларни дипломатик ечимга қайтишга чақиради”, — деди федерация ТИВ матбуот котиби Мария Захарова.

 

Қорабоғдаги можаро авж олган бир пайтда Ереванда ҳукумат биноси ёнида юзлаб одамлар бош вазир Пашинян сиёсатига қарши чиқиш ва унинг Тоғли Қорабоғ атрофидаги вазиятга аралашувини талаб қилиш учун йиғилишди. Намойишчилар билан полиция ўртасидаги тўқнашувлар натижасида бир неча киши жароҳатланган.

 

Республика Соғлиқни сақлаш вазирлиги баёнотида айтилишича, полиция ходимлари ҳам, фуқаролар ҳам тиббий ёрдамга мурожаат қилишган.

 

Ҳукумат биноси яқинида тўпланган намойишчилар Қорабоғда яна кучайган можарога Бош вазир Никола Пашиняндан аралашувни талаб қилиб, ҳукуматга қарши шиорлар айтишди. Кейинроқ намойишчилар ҳукумат биносига бостириб киришга уринган, шундан сўнг полиция куч ишлатган.

 

АҚШ Давлат котиби Энтони Блинкен тез орада Тоғли Қорабоғдаги янги можарони дипломатик йўл билан ҳал қилишга уринишда иштирок этиб, Озарбайжон ва Арманистон ўртасидаги музокараларда воситачи бўлиши мумкинлигини айтди.

 

“Биз томонларни тўғридан-тўғри музокараларни бошлашга чақирамиз. Қўшма Штатлар Арманистон ва Озарбайжоннинг узоқ йиллик муаммоларни ҳал қилиш ва тинчликка эришиш бўйича саъй-ҳаракатларини қўллаб-қувватлашга содиқ қолади”, — деди АҚШ Давлат котиби.

 

Бир кун аввал Халқаро Қизил Хоч колоннаси Степанакертга инсонпарварлик ёрдами: дори-дармон, озиқ-овқат ва энг зарур маҳсулотларни етказиб берди.

 

Блинкен инсонпарварлик ёрдамининг етказилиши Озарбайжон президенти Илҳом Алиев билан яқинда олиб борилган музокаралар натижаси эканини қайд этган.