Оғзини тикиб, очлик эълон қилган йигит қамалди
ИИББ ҳолат бўйича расмий изоҳ берди.
Тошкент вилоятининг Янгийўл туманида имтиёзли кредит олиш сўрови рад этилгани боис оғзини тикиб, очлик эълон қилган эркак қамалди. Ҳолат юзасидан вилоят ИИБ ахборот хизмати маълумот берди.
20 август куни Янгийўл тумани “Халқобод” МФЙда яшовчи 1991 йилда туғилган фуқаро С. Т. уст кийимларини ечиб, хонадон томига чиққан ва ўзини пастга ташлашини айтиб, бақириб атрофдагиларни йиғган.
Воқеа жойига етиб борган ҳудудий ИИБ ходимлари фуқарони тинчлантириш ва ундан нима мақсадда бу ишни қилаётгани сўраб, барчасини қонуний тартибда ҳал этилишини билдирган вақтларида, фуқаро ИИО ходимлари ва атрофдаги шахсларни турли куракда турмас сўзлар билан ҳақоратлаган. Баланд овозда сўкиниб, жамиятда юриш туриш қоидаларини қасддан менсимасдан, ушбу ҳаракатларини давом эттирган.
Ҳолат юзасидан шу куни ЖИБ Янгийўл туман судида ўтказилган очиқ суд мажлисида фуқаро С. Т. Маъмурий жавобгарлик тўғрисидаги кодекснинг 183- ва 194-моддаларида кўрсатилган ҳуқуқбузарликни содир қилганликда айбли деб топилиб, унга нисбатан 10 сутка маъмурий қамоқ жазоси тайинланди.
Фуқаро судда маълум қилишича, ўзини томдан ташлашига сабаб номаълум бир аёл (блогер) келиб, унга “шантаж қилиб масалангни ҳал қилиб юрибсан-ми?” деган сўзлари туртки бўлган.
Ушбу шахс муқаддам жиноят кодексининг 169- ва 105-моддаларида назарда тутилган жиноятларни содир этганлиги учун судланиб, тегишли тартибда чора кўрилган.
