Оқ уй яқинида отишма: Афғонистон фуқароси ҳибсга олинди
Икки нафар Миллий гвардия хизматчиси яраланган.
АҚШнинг Вашингтон шаҳри марказида, Оқ уй яқинида 26 ноябрь куни қуролли ҳужум содир бўлди. Ҳодиса натижасида Миллий гвардиянинг икки нафар хизматчиси жароҳат олди. Расмий маълумотларга кўра, отишма содир этган шахс қўлга олинган ва у 29 ёшли Афғонистон фуқароси Раҳмонулла Лаканвал экани аниқланган.
Дастлабки терговга кўра, Лаканвал Оқ уй яқинидаги патруль хизмати пайтида гвардия хизматчиларига қарата тўсатдан ўқ узган. Воқеа жойида бўлган бошқа ҳарбийлар ҳужумчини тезкор равишда зарарсизлантирган. Жароҳат олган икки нафар ҳарбийнинг аҳволи оғир бўлиб, улар тиббиёт муассасасига етказилган.
Тергов органлари ушбу воқеани террорчилик хуружига алоқадор деб баҳолаб, кенгайтирилган текширув ўтказмоқда. Маълум бўлишича, Лаканвал 2021 йилда афғон фуқаролари учун мўлжалланган махсус виза дастури доирасида АҚШга келган, бироқ унинг визаси муддати ўтиб кетган бўлсада, мамлакатда яшашни давом эттирган.
Ҳужум юз берган пайтда АҚШ президенти Доналд Трамп Флоридадаги расмий тадбирларда бўлган. Ҳодисадан сўнг Оқ уй ҳудуди вақтинча ёпилиб, федерал ва шаҳар ҳуқуқ-тартибот органлари кучайтирилган режимга ўтказилган. Президент Трамп воқеага муносабат билдириб, гумонланувчининг кескин жазога тортилишини таъкидлаган ҳамда Вашингтонга қўшимча 500 нафар гвардия хизматчисини юбориш бўйича топшириқ берган. Шундан сўнг пойтахтда хизмат олиб бораётган Миллий гвардия сони 2 200 нафарга етган.
