Ўқитувчиларни қийнаётган савол: ҳозирги вазиятда мактаблардан давомат талаб қилиниши тўғрими?
Маълумки, ҳозирда айрим вилоятларда дарс жараёнлари бошланган. Аммо, ҳаво ҳарорати совуқ экани ҳисобига жуда кўп ота-оналар фарзандини мактабга юбормаяпти.
Телеграм'даги "Xalq ta‘limi Info" канали админи Улуғбек Пўлатов мактабда ўқувчилар кам бўлгани учун мактаб маъмуриятидан давомат талаб қилишни бошлашгани, арим педагоглар шундай вазиятда бизга нисбатан жазо чораси қўллашса нима қиламиз дея унга мурожаат қилиб ёзаётганини маълум қилди.
"Бизнингча, бу вазиятда мактаб ходимларига жазо чораси қўллаб бўлмайди. Биринчидан, ҳозирги совуқ ҳавони ҳисобга олиш лозим. Иккинчидан эса бунга уларнинг ҳуқуқий асоси йўқ.
Масаланинг ҳуқуқий жиҳатига тўхталадиган бўлсак, қишки таътилни 18 январгача узайтириш бўйича Мактабгача ва мактаб таълими вазирлигининг 6 январдаги 1-сонли буйруғи ҳозир ҳам амалда.
Мактабларни 11 январдан бошлаб очиш эса оғзаки топшириқ билан амалга оширилди. Агар бу Мактабгача ва мактаб таълими вазирлигининг расмий буйруғи билан бўлганда эди ўқувчилар давоматини талаб қилиш мантиқан тўғри бўларди.
Умумий қилиб айтганда ҳозирги вазиятда давомат учун педагог ходимларни жавобгарликка тортиш мантиқсизликдан бошқа нарса эмас.
Қуйи тизимдаги айрим ўзини тушуниб, тушунмасликга олиб юраверадиган мутасаддилар мактаб маъмуриятидан давомат талаб қилса, уларга Мактабгача ва мактаб таълими вазирлигининг расмий буйруғи ва ҳаво ҳароратини яхшилаб кўрсатиб қўйиш керак", — деган Пўлатов.
