“Ўртоқларим соғайиб кетса, Уммон’ни тиклашга сўз бераман”

 

Ёшларнинг севимли гуруҳларидан бири “Уммон” санъат оламига яшиндек кириб келди. 2007 йилда ҳаваскор гуруҳ сифатида ташкил топган жамоа 12 йил аввал “Халқлар дўстлиги” санъат саройида илк яккахон консертини берган. Қисқа вақт ичида севимли юлдузга айланган — Зоҳид, Жасур ва Шоҳруҳдан иборат гуруҳ 2018 йилнинг ёзига келиб, айрим сабабларга кўра тарқалиб кетди. Зоҳид Рихсиев яккахон ижрочи бўлди, Жасур ва Шоҳруҳ эса “Уммон” номини сақлаб қолди. Лекин бу узоққа чўзилмади, орадан икки йил ўтиб, яъни 2020 йил бошида Жасур Рафиков ҳам  ижодни тўхтатди. Ўша йилнинг ўзидаёқ Шоҳруҳ ҳам санъатни тарк этди.

 

Яқинда гуруҳнинг собиқ аъзоси Зоҳид аянчли автоҳалокатга учради. ЙТҲ оқибатида у шифохонанинг жонлантириш бўлимига ётқизилди. Автоҳалокат содир бўлган кун ижтимоий тармоқларда хонанданинг саломатлиги ҳақида турли миш-мишлар тарқади. Буларга жавобан Шоҳруҳ дўстининг саломатлиги ҳақида тармоқ орқали оммага видеохабар қилди. 

 

Гуруҳнинг яна бир аъзоси Жасур Рафиқов ҳам анчадан бери саратон билан курашмоқда. Шу сабабли Шоҳруҳ Инстаграм саҳифасида дўстлари Жасур ва Зоҳид соғайиб кетса, мухлисларига уларни машҳурлик чўққисига олиб чиққан гуруҳни яна қайта тиклашга сўз берди.