“Овқатимизга атайлаб чўчқа гўшти қўшиб беришди”- урушдан қочган йигит
Россияда таксистлик қилган йигит ўзи билмаган ҳолда психотроп моддалари савдосига аралашиб, 9 йил-у 6 ойга қамалган. Сўнгра, россиялик ҳарбийлар жазони ижро этиш муассасасига келиб, уни ва бошқаларни афв этиш ва мамлакат фуқаролигини бериш эвазига урушга таклиф этган. Аммо, жазо ўтаётганларнинг ҳеч бири бунга рози бўлмагач, руслардан ташқари барча миллат вакиллари қаттиқ режимдаги изолёторга ўтказилган.
Наманганда Россия армиясига ёлланган йигит жиноий жазога тортилди. Zamon.uz суд ҳужжати билан танишди.
Суд ҳукмида келтирилишича, Наманган туманида яшовчи, 1995 йилда туғилган Р.С. 2021 йил 2 октябр куни ишлаб пул топиш мақсадида Россияга борган. У ерда таксистлик қилган Р.С. 2022 йилнинг январ ойида психотроп моддаларнинг ноқуноний савдоси билан ушланиб, 9 йил-у 6 ой муддатга озодликдан маҳрум этилган.
2024 йилнинг сентябр ойида бир гуруҳ россиялик ҳарбийлар Невянск шаҳридаги ЖИЕМга келиб, Р.С. ва бошқа маҳбусларни урушга таклиф этган. Уларга 1 йиллик шартнома имзолаш эвазига афв этилиши, ойига 200 000 рубл маош(30 млн сўм атрофида) тўланиши ҳамда мамлакат фуқаролиги берилиши ваъда қилинган. Дастлаб бунга ҳеч ким рози бўлмаган. Октябр ойида эса ЖИЕМ маъмурияти ҳеч қандай сабабларсиз рус милларига мансуб бўлмаган барча маҳбусларни қаттиқ режимдаги изолятор(карсер)га ўтказиш бошланган.
“2024 йил 3 октябр куни бизни карсерга киритишди, у ернинг шароити жуда ёмон - зах, деворлари ёрилган ва ҳавоси жуда совуқ эди. ЖИЕМ маъмурияти карсердагиларнинг овқатига атайлаб чўчқа гўшти қўшиб беришарди, сувни ҳам ўчириб қўйишди. Шу билан бирга бизга психологик ва жисмоний тазйиқ ўтказишарди, шу орада, ЖИЕМ бошлиғининг биринчи ўринбосари ким урушга кетишга рози бўлса ва урушда иштирок этиш бўйича бир йиллик шартномага имзо қўйса, карсердан чиқишини, агар имзо қўймаса, карсердан чиқмаслигини, шу ерда ўлиб кетишини айтди, шундан сўнг 2025 йил 4 январ куни шароит жуда ёмон бўлганлиги ва ўлиб кетмаслик учун жазо муддатини ўтаётган бошқа шахслар билан уларнинг таклифига рози бўлдик” – дейди йигит суддаги кўрсатмасида.
2025 йил 5 январ куни эса судланувчи Р.С. ҳамда унинг ҳамроҳлари Украинанинг Донеск вилояти Металист қишлоғида жойлашган дала полигонига олиб борилган. У ерда 10 кун тайёргарликдан ўтишгач, оддий аскар ҳарбий унвони ва мотоўқчи лавозими берилган. Шундан кейин, улар Зверова қишлоғи йўналишидаги жанг майдонига йўналтирилган. Жангга киришдан олдин ҳар бирларини автомат калашников, броножилет, каска, 4 та магазин ва 4 та граната билан қуролантиришган.
“Жангга кириш олдидан қисм командири ким жанг майдонидан ортига қайтса, яъни чекинса ўша заҳоти отиб ўлдирилиши тўғрисида буйруқ берди, шундан сўнг жанговар ҳаракатларга кирдик, 2025 йил 16 январ куни шерикларимнинг барчаси украиналик ҳарбийлар томонидан амалга оширилган ҳужум оқибатида вафот этишди. Мен танамга ўқ парчалари урилиб жароҳат олганим туфайли ортга қайтдим”- дейди йигит кўрсатмасида.
Шундан сўнг, Р.С.ни 24 январ куни Россия тасарруфидаги Селидова шаҳри орқали Екатеринбургдаги ҳарбий госпиталга олиб боришган. Йигит у ерда соғаймагач, мамлакатнинг турли ҳудудларидаги ҳарбий госпиталларда даволаниб чиққан. 21 март куни эса госпиталдан қочиб, Москвадаги Ўзбекистон элчихонасидан ёрдам сўраган. Ниҳоят, йигит 28 март санасида “Домодедва-Наманган” авиайўналишида Ватанга қайтиб келган.
ЖИБ Наманган туман судининг 2025 йил 30 декабрдаги ҳукми билан Р.С.га 3 йил 6 ой муддатга ишлаш, шунингдек иш жойигача бориш ва уйига қайтиш вақтидан ташқари озодликни чеклаш жазоси тайинланган.
