ЎзА ва "Шарқ" нашриёти биносини сотувга қўйган Давактивга огоҳлантириш берилди
Маданий мерос агентлиги ҳолат бўйича расмий муносабат берди.
“Шарқ” нашриёти ва ЎзА биноси Давлат активларини бошқариш агентлигининг электрон савдо платформаси орқали сотувга қўйилганди. Маданий мерос агентлиги уларни сотувдан олиш бўйича огоҳлантириш берилганини маълум қилди.
Тошкент шаҳри, Миробод тумани, Буюк Турон кўчаси, 41 ҳамда 42-уй манзилида жойлашган мулкий мажмуалар 20 сентябрь куни “E-auksion” электрон савдо платформаси орқали сотувга қўйилганди.
Маданий мерос агентлигининг билдиришича, Буюк Турон кўчаси, 41-уй манзилида жойлашган бинолар (“Шарқ” нашриёти матбаа корхонаси АЖ бинолари) Вазирлар Маҳкамасининг 2019 йилдаги қарори билан Моддий маданий мероснинг кўчмас мулк объектлари миллий рўйхатига маданий мерос объекти сифатида киритилган. Объект 1979—1983 йилларда қурилган жами 14 та бино, 2 та бино қисми ҳамда 5 та иншоотдан иборат бўлиб, умумий майдони 60 736,0 квадрат метрни ташкил этади.
“Маданий мерос объектларини муҳофаза қилиш ва улардан фойдаланиш тўғрисида”ги қонуннинг 23-моддасига мувофиқ Давлат мулкида турган моддий маданий мерос объектлари давлат тасарруфидан чиқарилиши ва хусусийлаштирилиши мумкин эмаслиги белгиланган.
Шунингдек, “Давлат мулкини бошқариш тўғрисида”ги қонунининг 19-моддаси учинчи хатбошига асосан моддий маданий мерос объектлари, архив ҳужжатлари, давлат музейлари ва муҳофаза этиладиган табиий ҳудудлар, шу жумладан, хиёбонлар ва ботаника боғлари хусусийлаштирилмайдиган давлат мулклари этиб эътироф этилган.
“Юқоридагиларни инобатга олган ҳолда Маданий мерос агентлиги томонидан Давлат активларини бошқариш агентлигига ушбу маданий мерос объектини аукцион савдоларидан олиб ташлаш юзасидан 21 сентябрь куни огоҳлантириш берилди”, — дейилади агентлик хабарида.
Хабарда ушбу ҳолат натижаси юзасидан келгусида қўшимча маълумот берилиши билдирилган.
