Ўзбекистон ҳарбийлари Афғонистон билан чегарада янги самолётни синовдан ўтказди
Ўзбекистон ҳарбийлари Афғонистон чегарасида Россия ва Тожикистон ҳарбийлари билан бўлиб ўтаётган қўшма машғулотларда Россиянинг учувчисиз самолётларини синовдан ўтказди.
Бу ҳақда «РИА Новости» хабар берди.
Маълум қилинишича, дронлар (учувчисиз самолётлар) узоқ масофали ҳаво разведкаси учун ишлатилган. Улар Ўзбекистонга экспорт шартномаси асосида етказилган.
«Ҳарбийлар ва Ўзбекистон Ички ишлар вазирлиги ходимлари манёвралар пайтида Россияда ишлаб чиқарилган ZALA 421-16E дронларидан фойдаланган. Бу қурилмалар оптик ҳаво разведкаси учун ишлатилади», дейилган хабарда.
Маълумот учун, ZALA 421-16E учувчисиз самолётларнинг энг машҳур тури ҳисобланиб, унинг юк кўтариш қобилияти сабабли бортига қўшимча ускуналар ўрнатиш мумкин. Дронлар тўсиқларга қарши чидамли ва 100 километргача бўлган масофада бошқарила олади. Улар пневматик катапултдан ишга туширилади.
Эслатиб ўтамиз, Россия, Тожикистон ва Ўзбекистон ҳарбийларининг машғулотлари Термиз полигонида 10 августгача давом этади.
